" لهجة كلام المصريين القدماء " 💁 زي الحال دلوقتى ، كان للقد...

” لهجة كلام المصريين القدماء ” 💁

زي الحال دلوقتى ، كان للقدماء المصريين عدة لهجات أو لكنات فى الكلام ، والاختلافات الإقليمية دى فى الكلام والكتابة ظهرت بأفضل صورة ليها فى “اللغة القبطية” اللى بدأت من القرن الثالث الميلادى تقريبا ، واللي كانت التطور الأخير للغة المصرية القديمة
لكن اللهجات دي كانت موجودة بلا شك فى عصور اللغة المصرية السابقة لكن مبنقدرش نلاحظها أوى فى النصوص ، على سبيل المثال عندنا رسالة من حوالى عام ١٢٠٠ ق.م بيشكى فيها كاتبها أن لغة المراسل غير مفهومة زي لغة مصري من ” الشمال ” بيتكلم مع مصري من ” الجنوب ”
وبالنسبة للغة القبطية فكان فيها خمس لهجات رئيسية ، وكانت اللغة الجنوبية القبطية المعروفة باسم ” الصعيدية ” هى الشكل الكلاسيكي ، أما اللهجة الشمالية واللى كان اسمها ” البحيرية ” فهى حاليا اللهجة المستخدمة فى الكنائس 💁

#حبة_Egyptology
#sallyahmed #bitofegyptology